從老蘭妓寨 看中環百年滄桑

英國國家檔案館（The National Archives）最近解封了700張舊香港圖片，但香港舊相收藏家余sir，手頭收集的大量中環舊圖片和舊故事，比之更有趣和更具人情味，可算是香港本土的民間檔案館。
可能好多人都知道現在的蘭桂坊前身叫「爛鬼坊」，但不知道其前身是妓寨，1920年代，蘭桂坊更是高級妓女聚集地，也叫Flower market，因為嫖客會買花造訪妓女。
中環也有華人血淚史，現在的萬宜大廈位置，當年是華洋分界線，萬宜向半山方向是洋人地帶，向上環方向則是華人區，所以當時的四大中國百貨公司，只能開設於萬宜大廈往西之地。
而佔中也非新鮮事，早在1989年，已有過百萬人塞爆中環……
記者：羅鈺歡
資料圖片：「香港舊照片」專頁提供

愛好歷史的余sir是匯基書院的中文、中史及中國文學科老師，從小開始鑽研中西歷史，2006年開始收集舊相，「做咗老師之後，少咗時間睇書，睇相係最實際了解歷史嘅快捷方法，儲舊相亦漸漸成為我嘅嗜好」。
他最初只是將舊相儲存在電腦內，慢慢越儲越多，「之後就放上網分享，順便當做backup」，就此引來過萬粉絲，更吸引不少志同道合之士在專頁內分享舊照，「開左email後勁多人掃瞄相片或翻攝畀我，佢哋話與其放喺倉底，倒不如放出嚟等更多人欣賞」，更有網民在專頁內仔細說出相片資料。

昔日的蘭桂芳是煙花之地，余sir細說此地青樓艷史。 劉啟文攝

1950年代，維港眺望中上環一帶，高處歐式建築，下層唐樓群。

1920年代的中環皇后像廣場。

1940年代的先施百貨，位於德輔道中。

1947年的石階路，現已設扶手電梯。

六四150萬人佔中　癱瘓港島

余sir話多數舊相都是由外國人拍攝，而且集中在「四環」，即中環、上環、西環、下環（灣仔）。二十年代開始多外國人定居香港，大部份都是上流人士，拍攝是當時有錢人的玩意。余sir喜愛儲建築物相，「因為歐陸建築買少見少，你可以去仿製，但已缺少咗靈魂，做唔番當年風格，同埋建築物點變都好，街道地段都唔會變」。現在的萬宜大廈位置，正是當年洋人和華人分界線，所以中國、大新、先施和永安四大中國百貨公司，只能開設於萬宜大廈往西之地。
今次余sir就帶我們認識舊中環，可能不少人都知道現在的蘭桂坊前身叫「爛鬼坊」，以其洋人集散為名，但很多人都不知道蘭桂坊前身是妓寨，「1920年代，蘭桂坊係高級妓女聚集地，亦叫Flower market，因為嫖客會買鮮花去造訪妓女，所以相中有好多賣花嘅舖頭，之後賣埋出殯白事嘅花圈，後來港英政府整頓市容，就將妓園移到西營盤石塘嘴一帶，所以又叫塘西風月」。
另外，中環昃臣道8號的歐陸古典建築、前立法會大樓，周邊變化最大，「前立會大樓本身已經先後被用作終審法院，同日佔時期曾被日本軍徵用為憲兵總部」，立法會旁的木球會和美利樓，現分別搬到跑馬地和赤柱，現時長江中心位置，曾是希爾頓酒店。「唯一冇變嘅係遮打花園位置，仍然是遊行終點站」。
講到中環最震撼的一件事，應該是1989年的全球華人大遊行，「純粹從六四紀念相睇政治係冇爭議餘地，相片係89年民運嗰年嘅5月28日，150萬人大遊行時從高空角度拍得嘅相片，相信呢個係真真正正佔領中環想得到嘅效果，整個港島北區都癱瘓，任何一個角度睇全部都係人頭」。

1928年，皇后碼頭及天星碼頭。

1941年，備戰中的高等法院。

1935年，英皇佐治五世（今英女皇祖父）登基銀禧紀念巡遊，途經閣麟街的中環街市。

1940年代石板街，街頭常有衣着破爛的精神病患者遊蕩。

1920年代，文咸東街是商業地區，主要做參茸海味生意。

1958年，中環干諾道中與必打街（畢打街）交界的舊郵政總局雄姿。

1920年代，中環中央街市。

1969年，中環和平紀念碑，當時市民可以隨意在紀念碑附近悠閒漫步，沒有圍欄阻止市民進入紀念碑範圍。

1900年代，中環堅尼地道山頂纜車天橋。

1971年，中環滙豐總行和中國銀行。

舊相收藏家余sir喜歡拿舊照到中環，尋覓百年遺韻。劉啟文攝

鑒古知今　歷史有圖有真相

余sir教書歷史科多年，都是以圖片教學，「說話可以煽情，一張相你都可以話我刪改偽造，但如果合併兩至三張相比較，就唔可以話冇發生過。簡單咁講，相片可以讓我哋鑒古知今，如果港人要決定香港應否爭取民主，請先了解香港歷史」。
他對現時熱話「佔領中環」沒有立場，但絕對支持普選，「佔中只是一個手段，但手段可以好多樣化」。他又認為香港市民絕對是和平示威，「以歷史相片嚟睇，無論係89年民運、03年7.1遊行，香港人都好和平，但共產黨對於一啲反對言論都比較敏感，所以言論未發生前已經設法防患未然」，最後他以高登仔名句總結香港歷史──「有圖有真相」。

• 較大字型

1920年代，中環德己立街與威靈頓街交界有多間妓寨和花舖，現時易名為蘭桂坊。