專題：單身婚照 一顆唔願嫁的心

Erica拍攝時很認真，不介意相中缺少了另一半。

隨着時代改變，披嫁衣已非新娘的專利。近年來，大批職場OL，不願被婚姻束縛，寧願單身披上嫁衣拍照留念，「其實只要影得靚，女仔自然鍾意，咁唔通唔結婚就一世唔使影婚紗相咩？」女護士Erica說。
資深婚紗攝影師Alan Tang也爆料指，原來當今單身拍婚照佔總客量五成，當中四成是「唔願嫁」，另有一成是待嫁敗犬女，兩者都是高學歷、高收入的專業女性。
另也有患癌母親帶女兒來，只想提前看看女兒最漂亮一面。
記者：羅鈺歡
攝影：胡智堅、劉啟文

近10年香港經濟好轉，女性的社會地位及薪金不斷提升，形成不少單身女士不願找如意郎君，她們寧願「唔嫁」，但拍婚紗照是每個女性從小到大的夢想，為了滿足自己，獨自去拍婚紗照蔚然成風。

如今單身港女拍婚照已成潮流。

佔客一半　專業女性為主

從事婚紗攝影多年的Alan指，早在2000年開始盛行單身婚照，並在2008成為熱潮，最高峯佔總客量七成，現時每月平均都有五成。「影單身婚紗相，大約四成係單身唔想嫁嘅女士，一成係恨嫁，但係唔知幾時嫁得出嘅女士」，而人客當中不少是律師、醫生、護士、心理醫生、大學講師、銀行家、管理層、商家等專業女性。
這天記者踫到來拍照的Erica，她是一名待嫁的護士，兩年前看到雜誌介紹婚紗攝影，已很想留倩影。「見到雜誌啲相影得咁靚，自己都想試吓，覺得女仔一定要影一輯婚紗相留住美好回憶」，當時仍是單身的她，沒想過將來會否結婚，只關心照片拍得漂不漂亮，「婚紗都係一種時裝造型，只要影得靚就得，唔通唔結婚就一世唔影婚紗相咩？」
她拍完之後還上了癮，短短兩年間，已拍了兩輯晚裝造型，「每次影嘅服飾、效果同心態都唔同，影相過程裏面攝影師會話畀我知擺乜嘢post最靚，自信心大咗，比以前更認識自己」。她直言嫁衣包括晚裝和婚紗，其實可以幾年拍一次，看看自己不同階段的美態。
攝影師Alan表示，即使打扮男性化的女高層，原來都希望攝影師找出她們溫柔的一面，「曾經有個客人，T-shirt牛仔褲入嚟，打扮好似地盤工人咁，第一眼望落去，真係搵唔到女人感覺，但係後來佢換咗婚紗之後，經過溝通、擺post之後，哇，女人味返晒嚟！」
拍過不同類型的婚紗照，他始終覺得單人婚紗再美也不是十全十美，「我覺得結婚相始終要兩個人一齊影，單身婚紗相只不過係着住件婚紗，冇真係結婚感覺」，他指每個人最幸福一面，到真正結婚時才會流露出來。

在攝影師指導下，單身女士盡現美態。

朱太（左）患癌後特地陪女兒拍攝嫁衣照。

Erica已拍過兩輯婚宴晚裝，今次主力拍攝婚紗照。

攝影師Alan指婚紗只是一種造型，婚照始終要兩個人才算完美。

患癌母：想睇女兒靚樣

除了趁青春留倩影外，單獨來拍婚紗照的人也有其他故事。「有啲已婚客人，因為老公成日冇時間陪自己，於是自己嚟影多次，回味吓當年啱啱結婚嗰陣嘅甜蜜；仲有啲激嬲咗男朋友，特登影輯靚相嚟𠱁返佢；仲有個客每年都影一輯，睇吓婚後同埋生仔之後，身形冇乜嘢變化，最騎呢有女仔專登影嚟放上網識男仔」。當中最令Alan難忘的，是一個50歲的兒科護士，「因為做嘢每日面對生死，令佢好低落，所以想我幫佢影張好開心嘅相放喺醫院」，她說美麗相片會使人快樂。
這天，記者還遇上朱太陪女兒前來，說是想看看女兒穿起晚裝的樣子；談久了，才知朱太已患有癌症，陪女兒來還別有一番心意。「因為時間過咗就冇，萬一我走咗，將來等人哋睇到佢今日嘅靚相，知道媽咪曾經咁愛佢，仲陪佢嚟影相」，她說最希望等到女兒真正披嫁衣的一刻。