胡孟青：銀行入職最低要求

70後紅褲仔出身的資深賓架，慨嘆今天新鮮人才難求，擔心行內青黃不接現象越來越明顯，加上金融海嘯後，獎金分紅今非昔比，已有部門負責每天撰寫投資通訊的小子請辭後，還未找到「替代品」；原來好多80、90後根本唔志在每月萬零蚊人工，皆因佢哋學歷有番咁上下，甚至放過洋，不少屬自小被寵愛一群。部份學生哥每月零用錢都不止幾千蚊，聽過最誇張的零用錢數目竟然係每月1萬元，富二代當然更不止此數。但這批是不需自行搵工的例外份子，既然返學都好似出糧咁出，試問初出茅廬的小子，又豈會看得起一份微不足道的月薪，還談甚麼鬥心！
諗起以前做卒嘅日子，巴不得有師傅過料教路，現看見不少新鮮人，你想教佢都擺出一副唔想學嘢款，驚死學完要做多啲。這賓架話，現對前線員工入職要求，已放低至只要對方有手、腳同口，對人有反應就可以。
服務業建基龐大消費群體，這群體基本要求是具備可持續賺錢能力，香港已沒有製造業，美其名第三產業掛帥，現連服務業都開始出現人才問題。再看歐豬國如意大利、西班牙同希臘，無不以服務業支撐經濟，獨沽一味同樣出事，難怪金融已被判死刑的美國，近年也要致力把製造業拉回本國，旨在令經濟發展可依賴多條出路，否則何以繼續支撐仍氣若柔絲的經濟？香港，是時候反思是否太側埋一邊、過份單一。