羊洲子彈飛 麻鷹變活靶

2011年12月10日issue with 

自從二次大戰結束之後，香港已經再冇打過仗嘞，不過咁樣唔代表呢個國際大都會已經恢復和平。好多人話香港人酷愛和平理性非暴力，討厭衝擊，可惜事實未必係咁。喺西貢嘅一個寧靜小島，長年累月有一班戰鬥員，得閒就會登島開火打野戰，戰火之下，生靈塗炭。
呢個戰地就喺羊洲，喺西貢碼頭對出不遠。嗰度本來係個無人荒島，住喺上面嘅居民，都係蛇蟲鼠蟻同埋飛鳥。環保團體好重視羊洲嘅保育，事關嗰度係過百隻麻鷹嘅居所，仲住咗珍貴嘅國家二級保護動物白腹海雕。不過香港係多元化嘅社會，有班人就認為郊野係用嚟踐踏嘅，雀仔係用嚟玩嘅。

變野戰場　樹木受摧殘
羊洲面積只有50公頃，仲細過香港濕地公園。環團「西貢之友」最近登島調查，見到島上樹木飽受摧殘，地面有大量塑膠子彈。西貢之友相信，有人將小島當做野戰場地，佢哋擔心野戰嘅槍聲會嚴重打擾雀鳥嘅棲息同繁殖，而射出嘅塑膠子彈更加會傷害野生雀鳥同鳥蛋。
最慘係政府似乎冇做任何嘢「反戰」，反而西貢區議會曾經研究大肆開發羊洲，建議將羊洲打造成自然公園，又話要喺島上起吊橋，等旅客可以喺樹頂之間遊覽。西貢之友堅決反對開發羊洲，並且反建議政府將羊洲劃做自然保育區，禁止一切發展。
西貢之友將會聯同綠色力量，聽日起一連兩周嘅星期六、日，喺西貢碼頭舉行第七屆「麻鷹節」，喚醒公眾羊洲生態嘅認識同關注。到時公眾可以透過望遠鏡遠眺羊洲嘅海鵰同麻鷹，目睹黃昏時候喺海面百鳥出沒覓食嘅壯觀情景。

吳爽

羊洲仲住咗珍貴嘅國家二級保護動物白腹海雕。

近月有人將麻鷹棲息的羊洲當作野戰場。綠色力量提供

島上的樹留有大量白色塑膠子彈

野戰客射出嘅膠子彈會傷害野生雀鳥同鳥蛋。