「新加坡海鮮喇沙」 篇.

去旅行，好多時因為想品嘗到真正地方風味的美食，然後因為舌頭試過，返到香港煮返同樣一道菜都會「寧舍不同」！眾多地方美食中，，在新加坡食過的喇沙絕對令我好難忘，一來因為鐘意食海鮮，二來椰香加少少辣好鬼醒胃無論之前食幾多，最後都實食到一大碗！最近因為新居入伙裝o左個新廚房，加上朋友帶來一個法國牌子Tefal出品，同英國靚仔廚神Jamie Oliver合作出的靚煲，就下定決心要煮返個靚喇沙宴客！

大家都知道新加坡出名城市規劃好，舊區重建成景點成功之餘，下年聽講又有新賭場同環球影城開幕。如果話食物反映文化，我覺得一碗好喇沙就好似新加坡咁，新舊共冶一爐，新係海鮮的新鮮，舊係湯底濃香的味道，煮時一定要先計劃好，按步就班！首先要輕輕煮熟材料：大蝦數隻(視乎人數) 及豆腐卜，正宗喇沙原本用螄蚶，但呢度叫得私房自創，我今日就用更易買到更「索」味的法國青口代替螄蚶，及用更爽口的粉絲(唔係fans呀！)，絕對會令你食多幾碗又更健康。將以上材料分別放入煲內煮熟，要留意另一材料芽菜唔需要煮，最後喇沙煮好時放係碗，用湯底滾一滾已經夠，先會爽口。

喇沙湯底的靈魂係正宗新加坡喇沙醬，原本要自製的話，材料好複雜：蝦膏、 芫茜粉、南薑、香茅、黃薑粉等十幾種材料！但依家只要去永安百貨食品部或印尼辦館就買得到，記住要買新加坡製造的最「惹」味！首先將買返來的喇沙醬倒入煲內，輕輕煮熱，然後加入椰漿同焯熟青口的鮮湯，份量比例係一碗椰漿就加一份焯熟青口的鮮湯，再加入花奶令味道更香滑！慢慢攪伴並煮滾，再放入先前準備好的粉絲及海鮮，稍煮一會，再放入豆腐卜，再煮滾，大功差不多完成。準備好碗、每碗放適量芽菜及有助減低肥膩感增加香味的檸檬葉 ，然後就可分別放海鮮、粉絲湯底，超惹味之新加坡喇沙完成！我班friend之前個個話飽，但喇沙一上檯，結果個個清晒，連湯都飲鬼哂！